يا وطن أمرك عجيب
مَرَضك عُضال وصَعيب
خليت حبيبك غريب
والعدو أصبح حبيب
واللي فداك ماله نصيب
غير جرح أبدا لا يطيب
واللي رماك قاصد يصيب
جعلته من قلبك قريب
يا وطن محتاج طبيب

.

.

وقطم ضهر الجمل ماحصلش بالساهل

مظلومة فيه القشة مهما تتاقِل

دا كان جمل حمال وبيه نتخايل

راكبين عليه كلنا

نخ الجمل من تُقل المحامل

!

.

.

.

.

تسألني عن احولنا وليه مختل الميزان

والأمة ليه مستباحة وعايشة ليه فى هوان

علشان حاميها حراميها

وحامي حراميها أمريكان

!

..

..

.

.

الرؤية مش واضحة والغمام ياما

الحزن عالفرحة طاغي كما شامة

إوعي تطلقي الصرخة

لكل دار أسرار

قومي البسي طرحة

داخل غريب الدار

!

.

.

.

.

زمان غية وانا في غيتي سارح

أَوَلِف يومي على ليلتي

واحَنِن بكرة عَ امبارح

وامد ايدي أحضنهم ونتصالح

يكون عمري طار مني

وانا والموت .. نتصافح

!

.

.

.

.

الود ودي آخد فـ حضني ناس البلد دي

وامد يدي بقلب قلبي وادي اللي عندي

يا بحر هَدي لازم أعدي

واقول لموجك مايعومش ضدي

.

.

ميم و واو و ألف و لام

قبل مني روميو هام

وقيس تجنن بالغرام

وعنترة من حب عبلة ..

ودَ تقبيل الحسام

.

.

ميم و واو وألف ولام

وانا ماني قادر عالخصام

ولااني واصل للمرام

وانا القريب عايش غريب

طفل مجبور عالفطام

.

.

الميم معاد

والواو وصال

والألِف أكيد أمال

والام لا محال

وناقص ايه تاني يا عم