بلاش تنبش
شاهين أبوالفتوح
1
بلاش تنبش في كوم القش
تحت الكوم أساس من غش
وفوقه شعب في عش
ماينفعش تقوله هِش
2
يا ابن بلدي قولي مالك
ايه جرالك
دا كل ما كان لك لسه مالك
لسه نيلك حياتك
وأرضك منها زادك
أنا منك أصارحك وأقولهالك
الضمير اللي زرعلك وبنالك
فيه ملاذك وخروجك من ظلامك
3
وكتير يا مصر بيحوموا حواليكي
أوعي تغمضي عنيكي
مش بس النسور
حتى أصغرها عصفور
له طمع فيكي
4
وأنا وأنت في الظلمة
الصمت مش حكمة
واجب تقول كلمة
صوتك دليلي إليك
5
مصر بتخطب ودك
وقالتلي أقولك
إنها بتحبك
زي ما حبت قبلك جدك
وصتني أقولك
نفسها تصنع بيدك لبسك
من كتانك أو من قطنك
تزرع قمحك .. تحصد دهبك
تنزع جدر الخوف من قلبك
وتاخدها بحضنك
6
مالي في بحرك شراع
لا مركب ولا مجداف
بيني وبين موجك صراع
واللي غرق .. هوَ اللي خاف
7
صاحبي يا حالة
مفيش في عقلك أي استحالة
هيمان بحبك
رغم أنه .. ورغم عنك
مش بحضنك
صدقني إني ما شفت قبلك
زي المحبة اللي بقلبك
8
لو أمرك مش ملك اديك
لو قلبك بيغمي عينيك
لو تاهت منك خطاويك
وتصهين ..
تبقى أنت شريك
الله أعلم ليه مخليك
لو شارب من ماء النيل
لو شايف إنسانه ذليل
لو ترضى ذل الأصيل
وتصهين ..
تبقى أنت شريك
الله أعلم ليه مخليك
9
الأولة حَدد
والثانية سَدد
والثالثة مَهد
الأولة حَدد مالك
والثانية سَدد سهامك
والثالثة مَهد بنارك
الأولة حَدد مالك واللي عليك
والثانية سَدد سهامك للي يعاديك
والثالثة مَهد بنارك نور لعينيك
الأوله آه
والثانية آه
والثالثة آه
الأولة أُصبر
والثانية أُصمد
والثالثة انهض
الأولة أُصبر واتجمل
والثانية أُصمد واتحمل
والثالثة انهض تتعَدِل
الأولة أُصبر واتجمل تتبدل الأحوال
والثانية أُصمد واتحمل شِلت ياما احمال
والثالثة انهض تتعَدِل ولا يبقى فيها محال
الأوله آه
والثانية آه
والثالثة آه
10
ميم و واو و ألف و لام
قبل مني روميو هام
وقيس تجنن بالغرام
وعنترة من حبه عبله
وَدَ تقبيل الحسام
ميم و واو و ألف و لام
ضحكتلي من غير كلام
ورموشها كانت سهام
قلبي هوى فلا يلام
ميم و واو و ألف و لام
يا ليل طويل مالك ختام
صابر عليك صلاة و صيام
مستني فجري من زمان
يا ربي ليه طال الظلام
ميم و واو و ألف و لام
بلادي ولكام ألف عام
كان الضمير فيها إمام
والضعيف يتقوى بيها
واللي منها لا يضام
ميم و واو و ألف و لام
بلادي مش من زمان
بان ليه عليها الهوان
مفيش حروب خضنا فيها
وعايشة ليه حالة انهزام !؟
ميم و واو و ألف و لام
11
وقالت
لو كلاب الطريق تخيفك
تطمع فيك ونابها يصيبك
لو نبحت بطريقك
عليها ما تردش
لأنه يعيبك
وقالت ..
الحق من غير قوة ما يتسمع له صوت
لازم يكونله فتوة
عادل بلا جبروت
ناس قبلنا قالوا
اللي اتخذ بالعصا
يترد .. بالنبوت
وقالت ..
بلا قوة إياك والترهيب
ولا تطلق سهامك ما لم تصيب
يحذر عدوك منك
وتصير لسهمه قريب
وقالت ..
خيل البراري جايز تكون حرة
لا في لجام يشكمها
لا كرة ولا فرة
لكن خيل العرب فوق التاريخ غُرة
دي بنت داحس م الغبرا
ودا أبن الابجر م العنقا
12
الود ودي آخد بحضني ناس البلد دي
وآمِد يدي بقلب قلبي وادي اللي عندي
يا بحر هَدي لازم أعدي
قول لموجك يكون معايا ما يكونش ضدي
13
لا موسى مطمن ولا عمرو مسرور
الأزمة طحن وبالحرب الرحا هتدور
وأوباما لا هو نبي
ولا عصاه مسحور
14
ضرب الإبداع
كان طفل نبيه يجي منه
لماح وفصيح فاق سنه
كان الأستاذ مشغول عنه
بابن الناظرة وابن اللي
الطفل اتخرج .. من سجنه
وده من صغره يحب الكورة
في المدرسة كان واد شطورة
من أسرة فقيرة ومستورة
منعوه م اللعب ما فلحش
رسم الملعب عالسبورة
وده كان عنده ميول فنية
يفرح من جملة موسيقية
لو كان لاقى حبة مراعية
كان أصبح إنسان فنان
مش سجان للحرية
وده مولود على ضهر الفرن
واخد أحلامه بالحضن
يحلم بالبيت والغيط والقطن
قام مالاقاش لا غيطان ولا جرن
15
يا وطن أمرك عجيب
مرضك قديم وصعيب
اللي هواك ماله نصيب
غير جرح ولا عمره يطيب
واللي رماك قاصد يصيب
جعلته من قلبك قريب
يا وطن محتاج طبيب
16
وليه صارت ملامحك صورة قديمة لـ ناعسة
كأنك مش حاسة ولا شايفة ولا سامعة
بيقولوا ربك شفى أيوب وعفاه ..
من النكسة !
17
أرسمك واجسدك
آمد ايدي ألمسك
أنزع ضلوعي أوجدك
ويبان بقلبي معبدك
18
فلان بأيه تعرفه
أنا قلت بصحابه
والقلب مين يفتحه
قلت أحبابه
ولكل واحد قدر
منحوت بكتابه
للحن يلزم نغم
يوزن أوتاره
للفكر يلزم قلم
يكتب أفكاره
ولو نسيت افتكر ..
للحب أسراره
19
أنا بنت إيزيس وعزيزة وبهية
وانا هاجر أم الأمة العربية
تقبلي أمك تخدم عندك
وتقولك : خدامتك مصرية !؟
المزيد
ـــــــــــــــــــــــــــــــــــــــــــــــــــــــــ
أظهر كافة المعلومات
